|
|
|
Laing hugna sa Livelihood Enhancement Skills Training gilusad By: Rose Anne C. Icalina * Monday, August 06, 2012 Lain na usab nga hugna sa Livelihood Enhancement Skills Training ang gilusad sa Brgy. Barra, dakbayan sa Dipolog karong bag-ohay pa lamang nga gipasiugdahan sa kagamhanang probinsyal ilawom sa administrasyon ni Gov. Rolando Yebes pinaagi sa Provincial Indigenous People Coordinating Unit (PIPCU) ug kauban ang Technical Education and Skills Development Authority (TESDA) . Ang maong bansay-bansay nga nagtanyag sa kursong Beauty Care naglangkob sa Haircut, Manicure ug Pedicure tipik sa scholarship program nga gimugna ni Gov. Yebes alang sa pagtabang sa mga lumad nga Subanen diha sa ilang pagpangimpleyo ug dugang kapanginabuhian. Napahimuslan kini sa 25 ka mga scholars. Sa susamang kalamboan, napahimuslan usab sa 15 ka mga scholars kinsa lumad nga mga Subanen ang kurso nga Aqua Culture, usa ka school-based nga kurso sa TESDA nga gipahigayon sulod sa Dipolog School of Fisheries. Kahibaloan nga ang unang hugna sa scholarship program nga gimugna ni Gov. Yebes gilusad sa lungsod sa Roxas kaniadtong Huyo 16 diin 25 ka mga kabatan-onan ang nakapahimulos sa kursong Automotive Servicing sulod sa tulo ka bulan ug 25 usab ang nakapahimulos sa Farm Machinery Operation & Maintenance sulod sa tulo ka semana. Ang maong programa sa kagamhanang probinsyal nga giabagan sa TESDA sa gitambayayong usab sa Department of Trade and Industry (DTI) ug Department of Labor and Employment (DOLE) diin aduna pa’y ilusad nga mga kurso sama sa Hito/ Tilapia Culture sa Brgy. Dumalogdog, Sindangan ug Dressmaking sa Brgy. Diwan, dakbayan sa Dipolog tipik sa Subanen Empowerment nga gihigusgan ni Gov. Yebes. |
| < Prev | Next > |
|---|