Dili na kapugngan ang pagpahigayon sa 2011 Palarong Pambansa sa dakbayan sa Dapitan sanglit mahinayon na kini karong Mayo 8-14 niining tuiga.

 Mao kini ang pormal ug klaro nga pagpahibalo ni Secretary Brother Armin Luistro sa Department of Education sa iyang pagbisita dinhi sa Zamboanga del Norte kagahapong adlawa uban ni Assistant Secretary Atty Tonisito Umali.

Dugang pa sa iyang mensahe atul sa Periodic Assessment of the 2011 Palarong Pambansa preparation nga gipahigayon sa Dapitan City Resort Hotel, siya nagkanayon nga human sa iyang pagbisita ug gihimong ocular inspection sa Jose Rizal Memorial State University Sports Complex, ilang nakita nga ang dakbayan sa Dapitan inabagan sa kagamhanang probinsyal ug sa mga katawhan sa Zanorte ang nakamugna ug milagro.

Kini matud pa sa kalihim nga dako ang kausaban sanglit  sa iyang pagpangutana ni Assistant Secretary Umali, lahi pa ang  hitsura niini, atul sa iyang pagbisita dinhi sa nakalabay’ng mga adlaw.

Si Luistro ang misusi sa grandstand, swimming pool, Zamboanga del Norte Convention Center ug uban pang lugar nga mamahimong magamit sa Palarong Pambansa.

Mainit ang nahitabong diskusyon tali na sa prensa  og sa mga dinapit nga mga mamumulong sa Philippine NGO Council (PNGOC),  human naka presenter sa ilang  pagpasabot mahitungod  sa Reproductive Health Bill sa gipahigayong “Regional Media Conference on Responsible Parenthood-Reproductive Health  Bill” kaniadtong Marso akense ning tuiga didto sa Grand Astoria Hotel, Zamboanga City.

Ang maong kalihukan gitambungan sa  prensa nga nag-gikan sa nagkalain-laing probinsya/syudad sa tibuok Mindanao.

Si Former Congresswoman Liza Largoza – Maza, sa Gabriela Partylist, ang  maoy  mipasabot sa ‘The Responsible Parenthood-Reproductive Health Bill”, siya nagkanayon nga “ 11 women dies every twenty-four hours due to pregnancy and childbirth-related complications thus making the Philippines one of the highest Maternal Mortality Rate (MMR) in Asia. These deaths can be avoided if more Filipino women have access to reproductive health information and health care.  The Philippines also has more than 60% of pregnancies classified as high-risk (2003 National Demographic and Health Survey).  Based on the Family Planning Survey of 2006, 2.6 million Filipino women would like to plan their families but lack information and access to do so.”

Nakahan-ay na ang mga nagkandaiyang kalihokan alang na sa ika-29 anyos nga kasumaran sa pagsaulog sa Araw ng Leon B. Postigo ning lalawigan.

Mao kini ang gibutyag ni Ms. Rhamawia Hambali, ang Municipal Infotmation Officer sa naasoy’ng lungsod diin ang maong kasaulogan sugdan kini karong umalabot Marso 21 ug matapos kini sa Marso 25 ning kasamtangang tuig.

Asoy pa ni Hambali nga aduna sila’y dulang pamapugnat sa kusog kon LGU Sportsfest, Inter-Barangay Tournament ingon man ang mga matag gabiing pasundayag.

Atong nasayran nga sa unang adlaw sa pagsaulog nianag gabie kon Marso 21 himuon nila ang Talent Night sa mga maanyag nga kandidata kon Ms. Leon B. Postigo 2011 ug ang ilang Coronation Night himuon usab kini sa Marso 24.

Subay sa ika-42 anyos nga kasumaran sa pagsaulog sa Araw ng Ramon Magsaysay sakop sa lungsod sa Salug ning lalawigan ang mga Barangay Opisyales sa naasoy’ng dapit ang mapasigarbuhon kining mopahigayon sa usa ka Invitational Got Talent 2011 nga gitakda nga himuon kini karong umalabot Marso 31 ning kasamtangang tuig.

Mao kini ang gibutyag sa amahan sa nasangpit nga barangay nga si Kapitan Gil Lomarda nga ang maong Got Talent usa kini ka Invitational Contest nga diin ang makasalmot niini pwede ma indibidwal o grupo kinsa nga nagpangidaron gikan sa 15 anyos pataas ma babaye man o lalaki.

Hayan dili na mawala sa lalawigan sa Zamboanga del Norte ang Hudyaka Zanorte Festival bisan paman mokanaug na si Governor Rolando Yebes alang sa iyang katapusang termino karong tuig 2013 tungod kay adunay ordinansa ang giduso karon ni 2^nd District Board Member Ricky Mejorada, kinsa mao karon ang chairman sa Committee on tourism sa Sangguniang Panlalawigan.

Kini usa ka ordinansa  alang sa pagtukod ug tinuig nga provincial festival nga mao ang  Hudyaka Zanorte Festival ug sa paggahin  ug pundo alang niini.

Sa pagpakighinabi sa DXFL headline balita ngadto ni Board member Mejorada human sa committee meeting kagahapon nga gitambungan sa city and municipal tourism officers sa lalawigan, siya nagkanayon nga sa pipila na ka tuig nga gisaulog ang Hudyaka Zanorte Festival sukad paglingkod ni Governor Yebes, wala pay nahimong local nga balaod-on nga magsilbing basehanan sa pag-establisar sa maong kalihukan.

Gipasiugdahan sa mga opisyales sa Zanorte ang tulo ka Zanortehanon kinsa mitapos sa PMA Class 2011 Lakas Tipon Alagad ng Bayan o LAON ALAB kaniadtong Marso 6 niining tuiga sa Fort del Pilar, Baguio City.

Human sa regular session sa Sangguniang Panlalawigan niadtong Lunes, Marso 14, si Gov. Rolando Yebes uban nila Vice-Gov. Francis Olvis ug mga membro sa SP, mihimo ug testimonial dinner alang nila 2^nd Lt. John Rigor Caliso Guiang, Ensign Mar Gil Faborada Campaner ug Ensign Rose Ann Guyagoy Ducoy.

Si Ret. Gen Alexander Yano, ang kanhi AFP Chief of Staff ug Ambassador to Brunei Darussalam kinsa maoy pinasidunggang mamumulong, sa iyang mensahe siya nagkanayon nga ang tulo ka Zanoertehanon lakip sa 196 nga mitapos sa PMA.

Si Yano uban sa mga SP members mipadayag nga ang pagsulod sa PMA dili sayon sanglit makasinati ka ug mga lisod nga mga bansay-bansay ug kinahanglan lamang nga magmalig-on aron makab-ot ang ambisyon.

Gilusad dinhi sa Zamboanga del Norte alang sa upat ka mga lungsod sa atong probinsiya ang COCOPAL usa ka programa pagpalambo sa industriya sa Cocoa, Coconut ug Palay.

Usa ka agricultural development initiative gi-implementar pinaagi sa ACDI/VOCA usa ka organisasyon kansang funding support gikan sa US Department of Agriculture.

Tumong niini mao ang pagtabang sa mga mag-uuma dinhi sa Zanorte aron ma-alibyo ang ilang kahimtang sa kinabuhi pinaagi sa pagpalambo sa produkto sa agrikultura. Ang nahisgutang programa kini ang ipatuman sulod sa tulo ka tuig dinhi sa atong probinsiya. Ang unang upat ka mga lungsod nga matabangan mao ang Katipunan, Roxas, Leon Postigo ug Kalawit. Apan target sa maong programa nga malukop ang tanang mga lungsod sa Zamboanga del Norte.

Sa gipahigayong programa paglusad sa COCOPAL , gipadayag ni Governor Rolando Yebes ang iyang pagdayeg sa maong programa. Alang kaniya ang Zamboanga del Norte walay laing padulngan kung dili ang agrikultura. Gikan pa kaniadto mao kini ang iyang panglantaw ug maoy gustong mahitabo aron matabangan ang mga pobreng katawhan. Ang Zanorte giila kaniadto nga maoy pinaka-pobreng probinsiya sa tibook nasud. Pinaagi sa agrikultura ug turismo maoy nag-unang gitotokan nga programa sa iyang administrasyon mahaw-as ang lalawigan gikan sa kalisud.

Ang pagbatun sa tukmang supply sa pagkaun sa tawo maoy mosunod nga giyera nga maoy paga-atubangon sa tanan. Kini ang gipalanog nga mensahe ni Governor Rolando Yebes sa pagtimaan sa lungsod sa Roxas ug Katipunan sa kasabutan tali na sa Regional Fisheries Livelihood Program sa United Nations Food and Agriculture Organization ug sa Bureau of Fisheries and Aquatic Resources alang na sa pagtugyan ug patrol boat sa duha ka lungsod uban sa motorsiklo ug computer.

Kini gipahigayon SA Sangguniang Bayan sa lungsod sa Katipunan nga gitambungan nila ni Governor Yebes, BFAR Regional Director Ahadulla Sajili ug ang consultants sa Regional Fisheries Livelihood Organization sa pagpangulo ni Mr. Benjamin Francisco ang national program coordinator.  Matud pa ni Governor Yebes kini ang nakita sa mga batid kay sa kasamtangan nakatutuk lamang halus tanan sa problema sa panggamit para sa pagpadagan sa atong industriya nga mao ang petrolyo ug nakalimtan ang kabahin sa supply sa pagkaun. Mismo dinhi sa atong probinsiya sama sa Dipolog, Katipunan ug Roxas nasinati na ang pagminus sa supply sa pagkaun gikan sa atong kadagatan. Kini nagpanghitabo gumikan kay anaa ang pagpasagad sa pagkuha sa atong mga isda sama sa lupoy nga unta kon gipasagdan pa nga mahingkod kini mahimo na untang tamban o tuloy.

Laing lungsod na usab dinhi sa zamboanga del norte ang nakadawat karon ug hinabang financial gikan sa kagamhanang probinsiyal. Kagahapon personal nga gitunol mismo ni governor Rolando yebes ngadto sa mga opisyales sa lungsod sa leon postigo sa pagpanguna ni mayor Rolando tablezo ang cheke nga nagkantidad sa usa ka milyon ka pesos nga silbing hinabang pinansiyal. Ang maong usa ka milyon ka pesos nga financial assistance kini ang gamiton sa kagamhanang local sa leon postigo pagpatuman diha sa ilang mga priority projects. Mahinumduman nga kadtong mga local government unit nga misalmot sa hudyaka festival sa zanorte kini ang makadawat ug hinabang pinansiyal gikan sa probinsiya sa kantidad nga usa ka milyon ka pesos...

Dako ang paglaum karon ni Governor Rolando Yebes nga molambo pa ang lungsod sa Gutalac  sakop sa lalawigan sa Zamboanga del Norte, kini pinaagi sa pagtinabangay sa mga lederes sa lungsod ug sa probinsiya.

Kini maoy mensahe nga gipaabot sa gobernador atol sa pagsaulog sa  ika 36 ka tuig nga anibersaryo pagkahimugso sa lungsod.

Gipasidunggan sa Gobernador ang mga katawhan sa gutalac uban sa opisyales niini sa pagpangulo ni Mayor Mariano Candelaria, Jr. sa panaghi-usa ug kakugi nga gipakita alang sa kaayohan sa mga katawhan. Ang gitukod nga buklog nagpakita lamang kini nga gihatagan ug igong bili sa mga katawhan sa Gutalac ang pagbalik lantaw sa atong kasaysayan nga nagagikan sa dugong subanen. Ang gitukod nga buklog sa Gutalac maoy giilang pinaka-taas ug pinakadako nga anaa sa 15 ngadto sa 20 ka tiil ang gitas-on.

Dako ang paglaum ni Governor Yebes nga pinaagi sa lederato ni Mayor Candelaria mabusog sa mga kalambuan ang lungsod. Iyang hagit ngadto sa mga katawhan padayon ang kakugi uban sa iyang pasalig nga magpabilin ang pagtabang sa probinsiya alang sa lungsod sa Gutalac.